ᓯᑯᒃᑯᑦ ᖃᓕᕋᓕᑦᑕᕐᓂᖅ ᐃᑲᔪᕐᓯᓂᖃᓐᒪᕆᑉᐳᖅ ᑎᒥᒧᑦ ᓴᓐᖏᓇᕐᑐᖃᒻᒪᕆᓐᓂᖏᑎᒍᑦ ᒥᑦᑎᒪᑕᓕᒻᒥ, ᑲᖏᕐᑐᒑᐱᒻᒥᓗ
ᓄᓇᓕᓐᓂ ᐃᓄᐃᑦ ᐃᖃᓪᓕᐊᕐᑏᑦ ᒥᑦᑎᒪᑕᓕᒻᒥᑦ ᐊᒻᒪ ᑲᖏᕐᑐᒑᐱᒻᒥᑦ ᐃᖃᓗᓐᓂᐊᕐᐸᑦᑐᑦ ᐊᑯᑭᑦᑐᓂ ᖃᓕᕋᓕᓐᓂ ᓯᑯᒃᑯᑦ ᖃᓂᒋᔭᖏᓐᓂ ᓄᓇᓖᑦ ᓂᕿᑦᓴᑦᓯᐊᕚᓗᓐᓂᒃ ᑎᒥᒧᑦ, ᑲᔪᓯᑦᓯᐊᖏᓐᓇᕐᓂᐊᕐᑎᓪᓗᒍ, ᓄᓇᓕᓐᓂᓗ ᐊᑲᐅᔪᒻᒪᕆᐅᓪᓗᓂ ᐃᖃᓗᒃ ᑎᒥᒧᑦ ᓴᓐᖏᓇᕐᑐᖃᒧᑦ ᓂᕿᒋᓗᒍ.
ᐃᖅᑲᓇᐃᔭᖃᑎᖃᑦᓯᐊᕐᓂᒃᑯᑦ ᕿᑭᕐᑖᓗᒻᒥ ᐃᖃᓗᓕᕆᔨᒃᑯᓐᓂᒃ, ᒥᑦᑎᒪᑕᓕᒻᒥ ᐊᖑᓇᓱᑦᑐᓕᕆᓂᕐᒧᑦ ᑲᑐᔾᔨᖃᑎᒌᑦ, ᐊᒻᒪ ᓇᖕᒪᐅᑕᖅ ᐊᖑᓇᓱᑦᑐᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᑲᖏᕐᑐᒑᐱᒻᒥ, ᐸᕐᓇᒃᓯᒪᓚᐅᕋᓗᐊᕐᒪᑕ ᐃᖃᓕᐊᕐᑐᒃᓴᐅᓂᕐᒧᑦ ᖃᓕᕋᓕᓐᓂᒃ ᐊᑐᕐᓗᑎᒃ ᐆᑦᑐᕋᕈᑕᐅᔪᒥᒃ ᒐᕙᒪᑐᖃᒃᑯᑦ ᐃᒪᕐᒥᐅᑕᓕᕆᔨᖏᓐᓄᑦ ᓚᐃᓴᓐᓯᖓᖓᓂᒃ ᐊᒻᒪ ᓂᐅᕈᑎᓕᐅᕐᓗᑎᒃ ᑮᓇᐅᔭᓕᐅᕈᑎᒋᓗᒍ. ᑭᓯᐊᓂ, ᐃᖏᕐᕋᑲᑕᒍᓐᓇᖏᒻᒪᑕ ᐊᒻᒪ ᑲᔪᓯᒍᓐᓇᕋᑎᒃ ᒪᑐᒋᐊᖃᕐᑐᑦ ᐱᔾᔪᑎᒋᓪᓗᒍ ᓄᕙᔾᔪᐊᕐᓇᕐᓂᖅ COVID-19 ᐊᔪᕈᑕᐅᒻᒪᕆᒻᒪᕆᑦᑐᖅ ᓂᐅᕕᐊᒃᓴᓕᐅᕆᐊᖅ 2020,ᒥ.
ᐃᒪᐃᓘᖓᓕᕋᔭᕐᑐᑦ, ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᓂᐅᕕᕐᓗᑎᒃ ᖃᓕᕋᓕᓐᓂᒃ ᓄᓇᓕᓐᓂ ᐃᖃᓪᓕᐊᕐᑎᓂᑦ ᐊᒻᒪ ᐊᑐᐃᓐᓇᕈᕐᑎᑕᐅᓗᑎᒃ ᓄᓇᓕᓐᓂ ᐊᑭᖃᕐᑎᓐᓇᒋᑦ. ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᐃᑲᔪᕐᓯᔭᐅᓯᒪᔪᑦ ᐃᖃᓪᓕᐊᕈᓐᓇᕐᓂᕐᒧᑦ ᐱᓕᕆᓂᐊᕐᑎᓪᓗᒋᑦ ᑖᒃᑯᓇᖓᑦ ᑲᓇᑕᐅᑉ ᐅᑭᐅᕐᑕᕐᑐᐊᓂ ᐱᕙᓪᓕᐊᔪᓕᕆᓂᕐᒧᑦ ᑎᒥᐅᔪᓂᑦ, ᐊᒻᒪ ᒐᕙᒪᖏᓐᓂᑦ ᓄᓇᕗᑦ, ᐃᖃᓗᓕᕆᔨᓂᑦ ᐊᒻᒪ ᓇᑦᓯᓕᕆᔨᓂᑦ.
“ᐊᕐᕌᒍᒋᔭᑦᑎᓐᓂ ᑲᔪᓯᑦᓯᐊᕐᓂᖃᓚᐅᕐᐳᒍᑦ ᐃᖃᓪᓕᐊᕐᓂᒃᑯᑦ, ᐅᖃᓚᐅᕐᑐᖅ ᒥᑦᑎᒪᑕᓕᒻᒥ ᐃᖃᓪᓕᐊᕐᑎ ᐊᒻᒪ ᕿᑭᕐᑖᓗᒻᒥ ᐃᖃᓗᓕᕆᔨᒃᑯᑦ ᐃᒃᓯᕙᐅᑕᖓᑕ ᑐᓪᓕᐊ ᓕᐅ ᑕᒃᑖᕐ. “ᐊᒥᓱᑦ ᐃᖃᓗᒐᓗᑦᑏᑦ ᐊᐅᓪᓚᖃᑦᑕᕐᑕᕐᓯᒪᓕᕐᑐᑦ ᓯᑯᒃᑯᑦ ᐊᒻᒪ ᐅᑎᕋᑦᔨᓪᓗᑎᒃ ᐅᖁᒪᐃᓐᓂᖏᑎᒍᑦ ᐅᓄᕐᑐᓂᒃ.”
ᐃᖏᕐᕋᖃᑦᑕᕈᓐᓇᕐᓂᖅ ᐊᒻᒪ ᐱᓕᕆᒍᓐᓇᕐᓂᖅ ᐋᖅᑭᒋᐊᕐᑕᐅᒃᐸᑕ ᐊᕐᕌᒍᓂᐊᕐᑐᒥ, ᕿᑭᕐᑖᓗᒻᒥ ᐃᖃᓗᓕᕆᔨᒃᑯᑦ ᐱᓕᕆᖃᑎᖃᓕᕋᔭᕐᑐᑦ ᓄᓇᓕᓐᓂ ᐊᖑᓇᓱᑦᑐᓕᕆᓂᕐᒧᑦ ᑲᑐᔾᔨᖃᑎᒌᓂᒃ ᖃᐅᔨᓴᕐᓂᒃᑯᑦ, ᑐᖅᑯᑐᐃᓂᕐᒥᒃ, ᖁᐊᒃᑯᕕᓕᕆᓂᕐᒥᒃ, ᐊᒻᒪ ᐊᐅᓪᓚᕐᑎᑦᓯᖃᑦᑕᕆᐊᖃᓂᕐᒧᑦ ᓂᐅᕕᐊᒃᓴᓂᒃ ᑐᕌᕆᐊᖃᕐᑕᖏᓐᓄᑦ. ᖃᓕᕋᓖᑦ ᓱᓕ ᐊᑐᐃᓐᓇᐅᖃᑦᑕᕋᔭᕐᑐᑦ ᓄᓇᓕᓐᓂ ᓂᕿᒃᓴᐅᓗᑎᒃ, ᑐᒃᓯᕋᕐᑕᐅᓂᖏᑦ ᒪᓕᓪᓗᒋᑦ.
ᖃᓕᕋᓕᑦᑕᕐᓂᖅ ᒥᑦᑎᒪᑕᓕᒻᒥ ᐊᒻᒪ ᑲᖏᕐᑐᒑᐱᒻᒥ ᐊᕐᕌᒍᓐᓂ ᒪᕐᕉᓐᓂ ᐊᖏᔪᐊᓘᔾᔮᖏᑦᑐᖅ ᐊᐅᓚᐅᓂᐊᒍᑦ ᐊᐅᓚᔾᔭᒋᐊᓱᖓᕐᐸᑕ ᑲᔪᓯᒋᐊᓖᑦ. ᐃᖃᓗᓕᕆᖃᑦᑕᕋᔭᕐᑐᑦ ᓄᓇᓕᓐᓂ ᓄᑖᒥ ᖁᐊᒃᑯᕕᖏᓐᓂ ᑕᒪᐃᓐᓂ ᓄᓇᓕᓐᓂ. ᐱᓕᕆᐊᕆᔭᐅᓂᖏᓐᓂ ᐃᖃᓗᓕᕆᓂᕐᒧᑦ ᐱᓕᕆᐊᒃᓴᖏᑦ ᕿᑭᕐᑖᓗᒻᒥ ᐃᖃᓗᓕᕆᔨᒃᑯᑦ ᐃᑲᔪᕐᓯᓯᒪᓂᐊᕐᑐᑦ ᐊᑦᑕᓇᖏᑦᑐᒃᑯᑦ ᓂᕿᓕᕆᓂᕐᒧᑦ ᐃᓕᓴᐃᓂᒃᑯᑦ, ᐃᖃᓗᓐᓄᑦ ᓱᓇᕐᕈᑎᓕᕆᓂᒃᑯᑦ, ᐱᓕᕆᐊᒃᓴᓕᕆᓂᒃᑯᑦ, ᐊᒻᒪ ᐊᐅᓚᑦᓯᓂᒃᑯᑦ ᐃᑲᔪᕐᓯᒋᐊᕈᑎᒃᓴᓂᒃ ᓄᓇᓕᓐᓂ.
“ᐃᒫᒃ ᐃᓄᐃᑦ ᐃᖃᓪᓕᐊᕐᑏᑦ ᓄᓇᓕᓐᓂ ᑲᔪᓯᑎᕙᓪᓕᐊᒐᔭᕐᓗᓂᐅᒃ ᐱᕙᓪᓕᐊᑎᐅᓂᖓ ᓂᐅᕕᐊᒃᓴᓕᐅᕐᓂᒃᑯᑦ,” ᐅᖃᓚᐅᕐᑐᖅ ᕿᑭᕐᑖᓗᖕᒥ ᐃᖃᓗᓕᕆᔨᒃᑯᑦ ᐱᓕᕆᐊᖑᔪᓂᒃ ᑲᒪᔨᒻᒪᕆᐊ, ᑯᕆᔅ ᕙᓚᓂᑲᓐ. “ᐃᖃᓗᓐᓂᐊᕐᐸᒻᒪᑕ ᓯᑯᒃᑯᑦ, ᐊᒻᒪᕐᑎᕆᔨᐅᓪᓗᑎᓪᓗ ᓯᑯᒥᒃ, 6 ᕕᓐᓄᑦ ᐃᔾᔪᑎᒋᔪᒃᑯᑦ ᓯᑯᒃᑯᑦ, ᐊᒻᒪ ᐅᓯᑲᑕᕐᓂᒃᑯᑦ ᖃᓕᕋᓕᓐᓂᒃ 100,ᓂᒃ ᐅᖁᒪᐃᓐᓂᖃᕈᓐᓇᕐᑐᓂᒃ ᐃᖅᑲᖓᓂᑦ ᓄᓈᕐᑎᕆᓪᓗᑎᒃ. ᑕᒪᓐᓇ ᐱᔭᕆᐊᑐᔪᐊᓗᒃ.”
ᓄᓇᓕᓐᓂ ᐃᖃᓪᓕᐊᕐᑏᑦ ᐃᖃᓗᑦᓯᐅᖃᑦᑕᕈᒪᔪᑦ ᐊᒻᒪ ᓂᐅᕕᐊᒃᓴᓕᐅᕈᒪᔪᖅ ᖃᓕᕋᓕᓐᓂᒃ ᓯᑯᒃᑯᑦ ᐃᖃᓗᑦᑕᕕᓂᕐᓂᒃ ᐅᖃᓕᒪᔪᒃᓴᐅᕗᑦ ᐊᖑᓇᓱᑦᑐᓕᕆᓂᕐᒧᑦ ᑲᑐᔾᔨᖃᑎᒌᖏᓐᓄᑦ ᒥᑦᑎᒪᑕᓕᒻᒥ ᐊᒻᒪ ᑲᖏᕐᑐᒑᐱᒻᒥ.